التخرج من تحدي الـ29 يوم

 هلاااااااااو شباب شلونكم أن شاء الله تكونون بخير..

اول شي احب أكوله أن الحمد لله رب العالمين تم هذا التحدي على خير ونتيجة حلوة وتعلم ولو جزء بسيط من مهنة لان كل مهنة بحر كبير ولابد انو تتطور بيها شيئاً فشيء.

اني التحدي أختلف عندي لان بلبداية كنت مقرر تحدي ممارسة الرياضة وبعدها وبسبب ضروف انجبرت على ممارسة عمل يعتبر من الاعمال الشاقة والمتعبة هية مهنة الحدادة وقررت انو هلتجربة هية راح تكون اساس التحدي الأكبر اللي راح اتحدة بيه نفسي واستمر واطور ولو بشيء بسيط ومن ثم ضبطها تماما وأيضا جميع العمل خلال الـ29يوم كان في بناية مكونة من ثلاث طوابق لذلك أيضا كان فيها جانب الرياضة متواجد من خلال استخدام الدرج في الصعود والنزول.

كل عمل ممجربه سابقا او اي شي جديد تكون عندك ردة فعل وتخوف من تجربة شي جديد وخصوصاً مايتعلق بهالمهنة ومخاطرها مثل آلة الكوسرة، آلة القص الكتر، ثقل الحديد وخاصة البليت وخطورة نقله او تجربة كذا مهنة ماعندك بيهة خبرة او عمل سابق.

ولله الحمد رغم الصعوبات والمعوقات اللي واجهتها ببداية العمل لكن بفضل الله كدرت اقاوم ضغوطات ومشقة عمل الحدادة وبديت اتعلم واجرب بين الفترة والاخرى اله واستعمالها وبلممارسة والتدريب والتشجيع النفسي اتقربت من هذه الآلات واستعمالها.

وأول شي اتعلمته وجربته هوة كيفية عمل آلة اللحيم واستعمالها ومن ثم تدريجياً استعمال آلة الكوسرة واستعمال والسيطرة على آلة الكتر (مقص الحديد) واستعمال طفاية الحرائق بسبب حريق صغير واجهنة أثناء العمل، إضافة إلى تعلم ضبط القياس بلفيته واستخدام الة المسدس لتثبيت المسامير والتطور الكبير الذي حصل في تعلم تخفيف وعمل اصباغ الحديد الاساس وصبغها باآلات التاروسة(المسدس رش) والرولة ولله الحمد والفضل له أولاً وأخرا في اعطائي الصبر والتعلم.

وبالاخير انصح كل شخص أو انسان إذا مر بضرف معين او انجبر على ممارسة شيء خارج إرادته انو لايستسلم للضروف ويستمر في ممارسة شيء يطور نفسه بيه حاضرا او مستقبلا، وعلى كل إنسان أن يتعلم شغلة جديدة بين الفترة والاخرى من الممكن انو تفيدة في المستقبل، واتمنى التوفيق لكل مجتهد.