تحدي الـ 29 يوم _ اليوم العاشر

 هلاااااااو شباب

شلونكم أن شاء الله بخير، طبعاً الحمدلله انو وصلنة لليوم العاشر بهذا التحدي الممتع. اتمنى تقرون مدونتي للأخير 

لكن التحدي الأكبر اذا مريت بضروف بالحياة تجيك بدون سابق إنذار، وتضيفلك تحدي آخر و تجبرك وتفرض عليك تحدي اقوة وأصعب من الاختاريته انته، بلبداية اني جنت أعمل في محل أسواق وتعرفون وضع الاسواق خاصة انو اغلب الوقت متتحرك ولياقة ماكو، فالتحدي ألاخذته انو لازم امارس الرياضة لعدة أسباب منها قلة الحركة وانعدام اللياقة .

ولكن مثلما كلتلكم بالأعلى بخصوص الضروف انفرض علي انو اترك الأسواق وأبدى ابحث عن عمل افيد بيه نفسي واستفاد منه، وهاي الرحلة سبحان الله صادفت باول يوم لبداية الـ29 يوم وكان اول عمل تحديت نفسي بيه ولازم ارتب وضعي هوة العمل في مطعم لكن العمل كان عكس التوقعات تماما ومتعب لدرجة متكدر تثبت بمكان ومدة العمل لليوم الواحد بحدود ال ـ17 ساعة خلال هاي المدة انته متحرك ومتثبت بمكان وهلشي جان رياضة بحد ذاته والمشتغل مطعم يعرف الاقصدة طبعاً اغلب المطاعم هيج نظام مو الكل استمريت بهيج عمل يومين وحركة وتعب وجهد ونته ممتحرك وعضلاتك ومفاصلك خاملة ونتو تخيلو الصار لدرجة الجسم عبارة عن تشنجات والام ونتيجتها اتعلمت شغلتين الأولى تعلمت شلون اذا اريد افتح كافتريا وشلون تتعامل وية الناس خاصة بخصوص اللفات، والثانية تعلمت ثرم وتكلاه الفلافل رغم التعب والمعاناة بس الحمد لله تعلمت منها شي ايجابي رغم سلبيات العمل اهمها الجهد القوي. 😁😌. 

بعد هليومين قررت اترك المطعم لان مثل مكتلكم انو ممتعود على هيج جهد واتجهت إلى عمل مع حداد وحاليا مستمر بيه بفضل الله، صح ممشتغل هيج عمل صعب من ناحية ثقل الحديد والنقل ومخاطر العمل، وخاصة العمل ببناية ودرج واصعد وانزل ونقل المعدات والغراض من مكان لآخر، وهالعمل أيضاً عمل ورياضة بنفس الوقت من ناحية التحرك وصعود الدرج ونزوله، لكن لله الحمد وخلال مدة سبوع تقريباً، اتعلمت هواي شغلات بلحدادة منها أخذ القياسات، وكيفية استخدام وعمل ماكنة اللحام، بالإضافة إلى كيفية صبغ الحديد ورشه بصورة صحيحة. 

وان شاء الله خلال الفترة القادمة راح اتعلم أشياء ثانية منها السيطرة على آله الكوسرة وطبيعة عملها بالإضافة إلى أن اطور من نفسي في تعلم أشياء أخرى لم يكن لي معرفة سابقة فيها وبالخصوص في شغلة الحدادة. 

وان شاء الله بنهاية هذا التحدي راح اكون متعلم هالمهنة وضابطها حته من الممكن انو تفيدني بفرصة عمل مستقبلاً بالإضافة إلى عدم ترك الرياضة والانشغال بالعمل الخالي فقط ومن الله التوفيق . 

وبلختام اتمنى من الجميع انو يتعلمون ويبحثون عن أعمال جديدة حت لو كان فيها صعوبة وان لا تستسلمون للضروف الصعبة واتحدو نفسكم وضروفكم وحققو وتعلموا شي جديد بحياتكم من الممكن انو تستفادون منه فيما بعد،،،. 

اتمنوا لي التوفيق وان شاء الله يحقق لنا مانطمح له في أيام حياتنا القادمة.