تحدي الـ 29 يوم،،، (يوم 20)

 هلاااااااو اصدقائي شلونكم شخباركم أن شاء الله وصلتو هذا اليوم ونتو محققين تقدم كلش حلو بهلتحدي الممتع..

طبعاً الحمدلله انو مستمر بهذا التحدي اللي كدرت اتحدى نفسي وابدي اجرب هيج شغل شاق ومتعب وهو شغل الحدادة والشي الاحلى والأجمل انو كاعد اضبط الشغل اللي اتعلمته واحقق بيه تحسن على العكس من اول المراحل والشغل اللي استمريت بيه خلال هذه الفترة القليلة السابقة هوة تعلم حل وتخفيف اصباغ الحديد وكيفية صبغ أساس الحديد سواء بطريقة الرش بالمسدس التاروسة، أو عن طريق الفرشة (الرولة) والحمدلله شغلي كلش حلو وكاعد اتحسن.

طبعاً الأغلب هسة يكول شغلك حدادة شدخلك بلصبغ، احب اوضحلكم أنو احنة مجموعة اشخاص نشتغل بمكان واحد وكل شخص اله شغلة معينة فإني خلال هاي الفترة اخذت تحدي انو اصبغ واتعلم اساسيات الاصباغ اضافة الى ما حققته بفضل الله وتوفيقة باساسيات الحدادة من لحام وقياس وقطع الحديد او البليت بقياسات مناسبة للعمل المكلف بيه.

ان شاء الله راح اطور نفسي أكثر خلال الفترة الجاية بكل ما يخص الحدادة وان شاء الله احقق نتيجة جيدة ممكن تفيدني اتعلم المهنة وربما العمل بها مستقبلاً. 

الشي اللي اكتشفته بهلتحدي انو لازم تحاول تغامر وتجرب هيج آلات خاصة أنها تعتبر من الآلات الجارحة والخطرة مع الانتباه الشديد والحذر من اي حركة قد تسبب لك الأذى. 

الشي اللي تفاجأت بيه كلش هوة عمل اله اللحيم بمجرد توصيل البارد على المكان المراد لحمه وتقريب واير اللحيم من الحديد سيعمل بمجرد الملامسة والتحريك البطيء ، أما الفكرة السابقة اللي كانت ببالي عن عملها كنت اتوقع عن طريق ضغط زر  وبوقتها كلش ندهشت. 

مشاعر خوض هيج تجربة كلش ممتعة وخاصة تشوف نفسك تتعلم شي جديد، والهدف الحالي انو اضبط تعلم مهنة الحدادة ومايرتبط فيها من صبغ وغيره. 

وهذا الفديو نبذة عن طريقة الصبغ بلرش بآلة التاروسة (المسدس) 

انصح كل شخص يشاهد مدونتي بتعلم مهنة وتجربة شغلة جديدة حتى وإن كانت صعبة، إن شاء الله بنهاية هذا التحدي راح اكون ضابط هالمهنة ولو بشكل مبتدأ، وانتظروني اشارككم بلنتيجة، شكراً الكم لقراءة مدونتي دمتم بخير وسعادة.